2,490 കോടിയുടെ ഇടിവിലും ഒന്നാമൻ ഷാരൂഖ് ഖാൻ; ബച്ചനും സൽമാനും പിന്നിൽ, ആസ്തി എത്ര?

ബോളിവുഡിൽ മാത്രമല്ല സിനിമ പ്രേമികൾക്കിടയിൽ ഷാരൂഖ് ഖാന്റെ ആരാധകർ അല്ലാത്തവർ വളരെ കുറവായിരിക്കും. ആരാധകരിൽ മാത്രമല്ല സമ്പത്തിന്റെ കാര്യത്തിലും ഷാരൂഖ് തന്നെയാണ് മുന്നിൽ. ഹുറൂൺ ഇന്ത്യ റിച്ച് ലിസ്റ്റ് 2026 പ്രകാരം ഇന്ത്യൻ സിനിമാ ലോകത്തെ ഏറ്റവും സമ്പന്നനായ താരമെന്ന പദവി ഷാരൂഖ് ഖാൻ സ്വന്തമാക്കി. മുൻവർഷത്തെ അപേക്ഷിച്ച് ആസ്തിയിൽ കുറവ് രേഖപ്പെടുത്തിയെങ്കിലും, സഹപ്രവർത്തകരായ മറ്റു പ്രമുഖ അഭിനേതാക്കളെക്കാൾ ബഹുദൂരം മുന്നിലാണ് ബോളിവുഡിന്റെ കിംഗ് ഖാൻ.

സിനിമകൾ, പരസ്യ ചിത്രങ്ങൾ, വിവിധ വ്യാവസായിക സംരംഭങ്ങൾ എന്നിവയിലൂടെ കെട്ടിപ്പടുത്തതാണ് താരത്തിന്റെ സാമ്രാജ്യം. പ്രമുഖ നിർമ്മാണ കമ്പനിയായ 'റെഡ് ചില്ലീസ് എന്റർടൈൻമെന്റ്', ഐപിഎൽ ഫ്രാഞ്ചൈസിയായ 'കൊൽക്കത്ത നൈറ്റ് റൈഡേഴ്സ്' എന്നിവ അദ്ദേഹത്തിന്റെ പ്രധാന വരുമാന സ്രോതസ്സുകളിൽ ചിലതാണ്.

നിലവില്‍ ഷാരൂഖ് ഖാന്റെ സ്വത്ത് 10000 കോടി വിലമതിക്കുന്നതാണ്. പോയ വര്‍ഷം ഷാരൂഖ് ഖാന് 12490 കോടി ആസ്തിയുണ്ടായിരുന്നുവെന്നാണ് ഹറൂണ്‍ ഇന്ത്യ റിച്ച് ലിസ്റ്റ് പറയുന്നത്. ഒരു വര്‍ഷം കൊണ്ട് ഷാരൂഖ് ഖാന്റെ സ്വത്തില്‍ 2490 കോടിയുടെ ഇടിവുണ്ടായിട്ടുണ്ട്. എന്നാല്‍ ഇത്ര വലിയൊരു ഇടിവുണ്ടായിട്ടും ഷാരൂഖ് തന്നെയാണ് ഒന്നാം സ്ഥാനത്ത്. രണ്ടാം സ്ഥാനം അമിതാഭ് ബച്ചനാണ്. അമിതാഭ് ബച്ചന്റെ സ്വത്ത് 4000 കോടിയാണ്. മൂന്നാണ് സ്ഥാനത്ത് സൽമാൻ ഖാനും ( 3000 കോടി) നാലാമത് ഹൃത്വിക് റോഷനുമാണ്. ഹൃത്വിക്കിന്റെ സ്വത്ത് 2500 കോടിയാണ്.

അതേസമയം, സിദ്ധാർഥ് ആനന്ദ് ഒരുക്കുന്ന കിംഗ് ആണ് ഇനി പുറത്തുവരാനുള്ള ഷാരൂഖ് ചിത്രം. പത്താൻ സിനിമയ്ക്ക് ശേഷം സിദ്ധാർഥ് ആനന്ദ് ഒരുക്കുന്ന മാസ്സ് ആക്ഷൻ ചിത്രമാണ് കിംഗ്. ചിത്രം ക്രിസ്മസ് റിലീസായി ഡിസംബർ 25 പുറത്തിറക്കാനാണ് അണിയറപ്രവർത്തകരുടെ പദ്ധതി. ആദ്യം ഡിസംബർ 4 ന് ആയിരുന്നു റിലീസ് പദ്ധതിയിട്ടിരുന്നത്. എന്നാൽ നവംബർ അവസാന വാരം ബിഗ് ബജറ്റ് ചിത്രം രാമായണ പുറത്തിറങ്ങുന്നതിനാൽ ക്രിസ്മസിലേക്ക് റിലീസ് മാറ്റിവെക്കാൻ കിംഗ് ടീം തീരുമാനിക്കുകയായിരുന്നു എന്ന് ബോളിവുഡ് ഹങ്കാമ റിപ്പോർട്ട് ചെയ്യുന്നു.

ഷാരൂഖ് ഖാന്റെ മകള്‍ സുഹാനാ ഖാന്‍ ആദ്യമായി ബിഗ് സ്‌ക്രീനിലെത്തുന്ന ചിത്രമെന്ന പ്രത്യേകതയും കിംഗിനുണ്ട്. ദീപിക പദുക്കോണ്‍, അഭിഷേക് ബച്ചന്‍, അനില്‍ കപൂര്‍ എന്നിവരും ചിത്രത്തില്‍ പ്രധാനവേഷത്തില്‍ എത്തുന്നുണ്ട്. വലിയ ബഡ്ജറ്റിൽ ഒരു ആക്ഷൻ ത്രില്ലറായി ഒരുങ്ങുന്ന സിനിമയ്ക്ക് മേൽ വലിയ പ്രതീക്ഷകളാണുള്ളത്. കിംഗിൻ്റെ സംഗീതം ഒരുക്കുന്നത് സച്ചിൻ ജിഗറും പശ്ചാത്തലസംഗീതം ചെയ്യുന്നത് അനിരുദ്ധ് ആണ്. സുജോയ് ഘോഷ് ആയിരുന്നു ചിത്രം ആദ്യം സംവിധാനം ചെയ്യാനിരുന്നത്. പിന്നീടത് സിദ്ധാർഥ് ആനന്ദ് ഏറ്റെടുക്കുകയായിരുന്നു.

Content Highlights: Shah Rukh Khan remains at the top among India’s wealthiest stars despite a reported drop in his net worth. The report also highlights the wealth rankings of other prominent Bollywood personalities, including Amitabh Bachchan and Salman Khan.